La Chanson de Roland

La Chanson de Roland

Carles li Reis, nostre emperere magnes, Set anz tuz pleins ad estet en Espaigne : Cunquist la tere tresqu’en la mer altaigne. N’i ad castel ki devant lui remaigne ; Murs ne citez n’i est remés à fraindre Fors Sarraguce, ki est en une muntaigne. Li reis Marsilies la tient, ki Deu n’enaimet ; Mahumet sert e Apollin recleimet : Ne s’ poet guarder que mals ne li ataignet. Aoi.

Li reis Marsilies esteit en Sarraguce : Alez en est en un verger suz l’umbre ; Sur un perrun de marbre bloi se culchet, Envirun lui plus de vint milie humes. Il en apelet e ses dux e ses cuntes : « Oez, seignurs, quel pecchet nus encumbret : « Li emperere Carles de France dulce « En cest païs nus est venuz cunfundre. « Jo nen ai ost ki bataille li dunet, « Ne n’ai tel gent ki la sue derumpet. « Cunseilez mei, cume mi saive hume ; « Si me guarisez e de mort e de hunte. »

N’i ad païen ki un sul mot respundet Fors Blancandrin de l’ castel de Val-Funde. Aoi.

Blancandrins fut des plus saives païens : De vasselage fut asez chevalers, Prozdom i out pur sun seignur aider. E dist al Rei : « Ore ne vus esmaiez. « Mandez Carlun, al orguillus e al fier, « Fedeilz servises e mult granz amistez : « Vus li durrez urs e leuns e chens, « Set cenz cameilz e mil hosturs muez, « D’or e d’argent .iiii. c. muls cargez, « Cinquante carres qu’en ferat carier : « Ben en purrat luer ses soldeiers. « En ceste tere ad asez osteiet, « En France ad Ais s’en deit bien repairer. « Vus le siurez à la feste seint Michel : « Si receverez la lei de chrestiens, « Serez sis hom par honur e par ben. « S’en voelt ostages, e vus l’en enveiez « U dis u vint pur lui afiancier. « Enveiums i les filz de noz muillers ; « Par num d’ocire i enveierai le men. « Asez est melz qu’il i perdent les chefs « Que nus perdum l’honur ne la deintet, « Ne nus seium cunduit à mendeier. » Aoi.

Dist Blancandrins : « Par ceste meie destre, « E par la barbe ki al piz me ventelet,

« L’ost des Franceis verrez sempres desfere : « Franc s’en irunt en France la lur tere. « Quant cascuns ert à sun meillur repaire, « Carles serat ad Ais, à sa capele, « A seint Michel tendrat mult halte feste. « Vendrat li jurz, si passerat li termes, « N’orrat de nus paroles ne nuveles. « Li Reis est fiers, e sis curages pesmes : « De noz ostages ferat trencher les testes ; « Asez est melz qu’il i perdent les testes, « Que nus perdum clere Espaigne la bele, « Ne nus aium les mals ne les suffraites. » Dient païen : « Issi poet-il ben estre. » Aoi.

Li reis Marsilies out sun cunseill finet : Si’n apelat Clarin de Balaguet, Estamarin e Eudropin sun per, E Priamun e Guarlan le barbet, E Machiner e sun uncle Maheu, E Joïmer e Malbien d’ultre-mer, E Blancandrin, pur la raisun cunter : Des plus feluns dis en ad apelez. « Seignurs baruns, à Carlemagne irez ; « Il est al siège à Cordres la citet. « Branches d’olive en voz mains porterez : « Ço senefiet pais e humilitet. « Par voz saveirs se m’ puez acorder, « Jo vus durrai or e argent asez, « Teres et fieus tant cum vus en vuldrez. » Dient païen : « De ço avum nus asez. » Aoi.

Li reis Marsilies out finet sun cunseill. Dist à ses humes : « Seignurs, vus en ireiz ; « Branches d’olive en voz mains portereiz : « Si me direz à Carlemagne le Rei « Pur le soen Deu qu’il ait mercit de mei ; « Ja einz ne verrat passer cest premer meis « Que je l’ siurai od mil de mes fedeilz. « Si receverai la chrestiene lei, « Serai sis hom par amur e par feid. « S’il voelt ostages, il en averat par veir. » Dist Blancandrins : « Mult bon plait en avereiz. » Aoi.

Dis blanches mules fist amener Marsilies, Que li tramist li reis de Suatilie. Li frein sunt d’or, les seles d’argent mises. Cil sunt muntez ki le message firent ; Enz en lur mains portent branches d’olive. Vindrent à Carle ki France ad en baillie, Ne s’ poet guarder que alques ne l’ engignent... Aoi.

Li Emperere se fait e balt e liet : Cordres ad prise e les murs peceiez, Od ses cadables les turs en abatiet. Mult grant eschec en unt si chevaler D’or e d’argent e de guarnemenz chers. En la citet nen ad remés paien Ne seit ocis u devient chrestiens. Li Emperere est en un grant verger, Ensembl’od lui Rollanz e Olivers, Sansun li Dux e Anséis li fiers, Gefreis d’Anjou li reis gunfanuners ; E si i furent e Gerins e Gerers : Là ù cist furent, des altres i out ben. De dulce France i ad quinze milliers. Sur palies blancs siedent cil chevaler, As tables juent pur els esbaneier, E as eschecs li plus saive e li veill ; E escremissent cil bacheler leger. Desuz un pin, delez un eglenter, Un faldestoed i out, fait tut d’or mer, Là siet li reis ki dulce France tient ; Blanche ad la barbe e tut flurit le chef, Gent ad le cors e le cuntenant fier. S’est ki l’demandet, ne l’estoet enseigner. E li message descendirent à pied, Si l’saluèrent par amur e par ben. Aoi.

Blancandrins ad tut premereins parlet, E dist al Rei : « Salvez seiez de Deu, « Le Glorius, que devez aürer ! « Iço vus mandet reis Marsilies li bers : « Enquis ad mult la lei de salvetet ; « De sun aveir vus voelt asez duner, « Urs e leuns e veltres enchaignez, « Set cenz cameilz e mil hosturs muez, « D’or e d’argent .iiii. cenz muls trussez, « Cinquante carres que carger en ferez ; « Tant i averat de besanz esmerez « Dunt ben purrez voz soldeiers luer… « En cest païs avez estet asez, « En France ad Ais devez ben repairer ; « Là vus siurat, ço dit mis avoez. » Li Emperere en tent ses mains vers Deu ; Baisset sun chef, si cumencet à penser. Aoi.

Li Emperere en tint sun chef enclin, De sa parole ne fut mie hastifs, Sa custume est qu’il parolet à leisir. Quant se redrecet, mult par out fier le vis. Dist as messages : « Vus avez mult ben dit. « Li reis Marsilies est mult mis enemis. « De cez paroles que vus avez ci dit « En quel mesure en purrai estre fiz ? » « — Voelt par ostages, ço dist li Sarrazins, « Dunt vus averez u dis u quinze u vint.

« Par num de ocire i metrai un men filz, « E si’n averez, ço quid, de plus gentilz. « Quant vus serez el palais seignurill, « A la grant feste seint Michel del Peril, « Mis avoez là vus siurat, ço dit, « Enz en voz bainz que Deus pur vus i fist ; « Là vuldrat il chrestiens devenir. » Carles respunt : « Uncore purrat guarir. » Aoi.

Bels fut li vespres e li soleilz fut clers. Les dis mulez fait Carles establer. El grant verger fait li Reis tendre un tref ; Les dis messages ad fait enz hosteler ; Xii. serjant les unt ben cunreez. La noit demurent tresque vint al jur cler. Li Emperere est par matin levez ; Messe e matines ad li Reis escultet. Desuz un pin en est li Reis alez, Ses baruns mandet pur sun cunseill finer : Par cels de France voelt il de l’ tut errer. Aoi.

Li Emperere s’en vait desuz un pin, Ses baruns mandet pur sun cunseill fenir : Le duc Oger e l’arcevesque Turpin, Richard le veill e sun nevuld Henri, E de Guascuigne le proz cunte Acelin, Tedbald de Reins e Milun sun cusin. E si i furent e Gerers e Gerins,

Ensembl’ od els li quens Rollanz i vint E Olivers, li proz e li gentilz ; Des Francs de France en i ad plus de mil ; Guenes i vint, ki la traïsun fist. Dès ore cumencet li cunseill que mal prist. Aoi.

« Seignurs baruns, dist li emperere Carles, « Li reis Marsilies m’ad tramis ses messages ; « De sun aveir me voelt duner grant masse, « Urs e leuns e veltres caeignables, « Set cenz cameilz e mil hosturs muables, « Quatre cenz mulz cargez de l’or d’Arabe, « Avoec iço plus de cinquante carres ; « Mais il me mandet que en France m’en alge : « Il me siurat ad Ais à mun estage, « Si receverat la nostre lei plus salve ; « Chrestiens ert, de mei tendrat ses Marches ; « Mais jo ne sai quels en est sis curages. » Dient Franceis : « Il nus i cuvent guarde. » Aoi.